O Consello da Xunta aprobou un convenio destinado á limpeza de franxas secundarias de protección contra incendios, cun orzamento global de 100 millóns de euros para catro anos, co obxectivo de reforzar a prevención do lume nos municipios galegos.
Porén, esta iniciativa non contou co apoio da Federación Galega de Municipios e Provincias (Fegamp), que rexeitou a proposta por unha marxe do 60%. O presidente da Xunta, Alfonso Rueda, lamentou esta decisión, ao considerar que a ausencia dun “convenio paraugas” con Seaga e a Fegamp complica o proceso, obrigando agora a que cada concello teña que adherirse individualmente se quere acceder a estas axudas.
Críticas á postura da Fegamp
A conselleira do Medio Rural, María José Gómez, tamén expresou tras o Consello a súa crítica á postura da Fegamp, acusando á entidade de comunicar o seu rexeitamento nun momento clave, cando xa se está “en tempo de desconto” para pechar o acordo. Segundo explicou, este atraso pode dificultar de maneira significativa a contratación de persoal e empresas encargadas de inspeccionar e limpar as franxas antes do 31 de maio, prazo no que estas deben estar totalmente acondicionadas. Para a conselleira, este posicionamento responde a motivacións “de índole política”, e non técnicas, dada a importancia do labor preventivo que se pretende fortalecer.
Paralelamente, e tamén no marco do reforzo das políticas de prevención e loita contra os incendios forestais, Alfonso Rueda anunciou a contratación de dous avións de carga en terra, que se sumarán ao dispositivo aéreo da Xunta para as anualidades de 2026, 2027 e 2028. O investimento previsto é de máis de 3,9 millóns de euros, ampliables ata 5,49 millóns mediante unha posible prórroga dun ano e outras modificacións. Estes novos medios permitirán dispoñer de dúas aeronaves adicionais durante 840 días de servizo, acumulando un total de 1.120 horas de voo dedicadas a tarefas de extinción e outras accións relacionadas coa defensa fronte aos lumes.
Apoio á rehabilitación de vivendas
Tamén, o presidente da Xunta avanzou un novo plan para reforzar a oferta de vivenda nos municipios galegos de menos de 5.000 habitantes mediante axudas para rehabilitar casas e transformar locais baleiros en fogares. O programa, aprobado polo Consello, contará cun orzamento total de 5 millóns de euros ata 2027, dos que 3 millóns se reservarán para a convocatoria de 2026. As achegas poderán acadar 30.000 euros por actuación e cubrir ata o 75 % do custo das obras.
As actuacións incluirán melloras de accesibilidade, conservación, eficiencia enerxética e medidas contra o gas radón, así como gastos profesionais, proxectos técnicos e taxas administrativas debidamente xustificadas. Ademais, a Xunta autorizou unha nova dotación de 11,4 millóns de euros para o Bono alugueiro mocidade en 2025, destinada a atender solicitudes en lista de agarda sen abrir unha nova convocatoria.