Mondariz (Pontevedra), 20 de xaneiro de 2026
O delegado territorial da Xunta en Pontevedra, Agustín Reguera, mantivo esta tarde un encontro con veciños da comarca do Condado Paradanta no concello de Mondariz, co obxectivo de informar sobre a apertura do prazo para solicitar a nova liña de axudas destinada á rehabilitación de vivendas en concellos con menos de 5.000 habitantes. Os interesados poderán presentar as súas solicitudes a partir de mañá, 21 de xaneiro, ata o 1 de setembro, sempre que o crédito da axuda non se esgote antes.
Reguera subliñou que esta nova liña de axudas se suma ás iniciativas que o Goberno galego está a implementar para apoiar aos concellos de menor poboación na garantía do acceso á vivenda. As axudas están dirixidas tanto á rehabilitación como ao remate ou ampliación de vivendas en concellos de 5.000 habitantes, cun importe que pode alcanzar ata 30.000 euros. Ademais, inclúese a posibilidade de transformar locais baleiros en vivendas, un proceso que xa foi simplificado grazas á modificación normativa en vigor desde hai un ano.
Orzamento e beneficiarios
A Xunta destina un orzamento bianual de 5 millóns de euros, financiados con fondos autonómicos, que poderán ser ampliados se a demanda de solicitudes supera a contía establecida. Segundo explicou o delegado, esta axuda beneficiará a un total de 24 concellos da provincia de Pontevedra. É importante destacar que os beneficiarios terán a posibilidade de recibir as axudas antes de iniciar as obras.
As achegas están dirixidas a propietarios ou usufrutuarios de vivendas ou locais situados en concellos de menos de 5.000 habitantes, sendo un requisito que a vivenda rehabilitada ou resultante do cambio de uso se destine a domicilio habitual e permanente, ben do seu propietario ou en alugueiro, neste último caso, durante un mínimo de cinco anos.
Compatibilidade das axudas
Esta nova liña de axudas é compatible con outras iniciativas de similar finalidade, tanto convocadas por diferentes consellerías da Xunta como por outras administracións, sempre que a suma das axudas non supere o custo total das actuacións. Neste sentido, Reguera destacou que as achegas son compatibles coas destinadas á adquisición de vivenda en concellos de menos de 10.000 habitantes, permitindo, por exemplo, a compra dunha vivenda abandonada con esta subvención e a súa posterior reforma coas novas axudas convocadas.
Por outra banda, no que respecta ás axudas do programa Fogar Vivo, estas non serán compatibles coa axuda de reforma, pero os propietarios poderán solicitar esta achega para cubrir o seguro de impago de rendas ou un seguro multirrisco para o fogar.
Obras subvencionables
A axuda cubrirá ata o 75% do custo das obras, cun importe máximo de 30.000 euros. As obras subvencionables no marco da rehabilitación inclúen traballos de accesibilidade, conservación, habitabilidade, sostibilidade e eficiencia enerxética. Tamén se contemplan actuacións para a medición e execución de obras que eviten a entrada de gas radon ou que adopten medidas para garantir a súa eliminación do interior das vivendas.
Ademais, no custo total das actuacións subvencionables pódense incluir os honorarios da redacción dos proxectos, informes técnicos e certificados necesarios, así como os gastos derivados da tramitación administrativa. Os gastos de impostos, taxas e tributos que estean debidamente xustificados tamén se poderán incluir.
A nova liña de axudas súmase a outras iniciativas da Xunta para impulsar o acceso á vivenda, como as achegas para a adquisición de vivenda en concellos de menos de 10.000 habitantes, que ofrecen maior contía para os menores de 36 anos, así como as axudas para rehabilitar vivendas de titularidade municipal ou para a rehabilitación de vivendas en concellos con Áreas de Rehabilitación Integral (ARI). Ademais, a Xunta puxo en marcha axudas para recuperar vivendas baleiras, que poden alcanzar ata 16.000 euros, a través do programa Fogar Vivo.