Santiago de Compostela, 22 de decembro de 2025
O conselleiro de Presidencia, Xustiza e Deportes, Diego Calvo, anunciou esta mañá a aprobación de dous novos decretos de emprego público durante a xuntanza semanal do Consello da Xunta. Estas ofertas inclúen un total de 123 prazas para persoal estatutario do sistema público de saúde e para persoal sanitario funcionario, co obxectivo de reforzar a atención sanitaria na comunidade galega.
En concreto, o Consello da Xunta aprobou un decreto que oferta “un total de 100 prazas para postos de difícil cobertura” en diferentes centros sanitarios do Servizo Galego de Saúde. Segundo indicou Calvo, destas 100 prazas, 41 son para diferentes categorías de facultativos especialistas en hospitais comarcais, 27 son de médico de urxencias e 32 corresponden á categoría de pediatra de atención primaria. Ademais, 7 prazas estarán reservadas á quenda de discapacidade xeral (ver anexo).
Oferta de Saúde Pública
Durante a reunión, o Goberno galego tamén aprobou un decreto que establece unha nova oferta pública de emprego para as escalas sanitarias da Lei 17/1989, do 23 de outubro. Esta oferta incluirá un total de 23 prazas vinculadas ao eido da saúde pública e da administración sanitaria, segundo explicou o conselleiro.
As prazas distribúense en 5 para farmacéutico inspector de saúde pública, 7 para inspector médico (1 reservada á quenda de discapacidade), 1 para licenciado en ciencias biolóxicas e 10 para subinspector sanitario (1 reservada á quenda de discapacidade). O sistema de selección será mediante concurso-oposición, respectando os principios de libre concorrencia, igualdade, mérito e capacidade.
Convocatoria de 54 prazas de funcionario sanitario
Ademais dos dous decretos aprobados, a Consellería de Sanidade informou sobre unha nova oferta pública de emprego que incluirá 54 prazas de diversas clases de persoal funcionario sanitario da escala de saúde pública e administración sanitaria. Este número de prazas corresponde ás ofertas públicas de emprego dos anos 2022, 2023 e 2024, que serán convocadas a través do sistema de concurso-oposición.
En detalle, a convocatoria incluirá 12 prazas de farmacéutico inspector de saúde pública, 10 de inspector médico, 2 de licenciado en ciencias biolóxicas, 3 de licenciado en ciencias químicas, 8 de licenciado en farmacia, 4 de licenciado en psicoloxía, 7 de enfermería e 8 de subinspector sanitario. Con estas convocatorias, o Goberno galego busca dar resposta ás necesidades organizativas e de persoal da Consellería de Sanidade e do Servizo Galego de Saúde, garantido a calidade asistencial e a eficiencia dos recursos dispoñibles.