Ourense, 5 de xaneiro de 2026
O director xeral da PAC e do Control da Cadea Alimentaria, Juan José Cerviño, e o delegado territorial da Xunta en Ourense, Manuel Pardo, mantiveron este mediodía en Ourense unha reunión con representantes da Asociación do Sector Primario de Galicia. No encontro, os responsables do Goberno galego reiteraron o apoio da Xunta aos agricultores e gandeiros galegos e explicaron a posición do Executivo autonómico en cuestións como o acordo UE-Mercosur ou a futura Política Agraria Común (PAC).
Apoio aos agricultores e gandeiros galegos
Respecto ao acordo co Mercosur, a Xunta comparte co sector a opinión de que os produtos agroalimentarios procedentes de terceiros países deben cumprir os mesmos estándares de calidade, sanidade e benestar animal que os comunitarios. Esta medida busca evitar a competencia desleal que poida xurdir fronte ao rigor dos produtores europeos, especialmente en aspectos relacionados coa sustentabilidade.
En relación á futura PAC, a Xunta manifestou a súa oposición á nova proposta da Política Agraria Común que entrará en vigor a partir de 2028. Esta postura, que se defendeu tanto ante o Ministerio de Agricultura como en Bruxelas, basease na preocupación pola perda de fondos que esta nova normativa implicaría. Estímase que a redución do orzamento podería alcanzar un 20 %, o que se traduce en aproximadamente 80 millóns de euros anuais menos para o sector rural galego.
Proposta centralista e a defensa do rural galego
Ademais, a Xunta considera que a proposta da nova PAC ten un enfoque centralista, ao establecer un fondo único para os estados membros que substituirá os dous piares diferenciados que existen actualmente. Esta mudanza podería comprometer medidas que son moi beneficiosas para Galicia, como os programas de desenvolvemento rural, que non quedarían garantidos coa nova normativa.
Neste contexto, o director xeral da PAC recordou que desde a Consellería do Medio Rural se lles propuxo aos membros do Consello Agrario a creación inmediata dunha comisión de traballo dentro deste órgano. O obxectivo é actuar de forma coordinada para defender os intereses do sector primario galego nas negociacións do Marco Financeiro Plurianual 2028-2032.
Dermatose nodular contaxiosa
Outro dos temas abordados na reunión foi a dermatose nodular contaxiosa (DNC), unha preocupación manifestada polos gandeiros. A Xunta insistiu na necesidade de que o Ministerio de Agricultura promova unha maior coordinación entre as diferentes comunidades autónomas para implementar medidas homoxéneas. Ademais, solicitou que lidere a creación dunha vacina específica que poida utilizarse de forma preventiva no marco da UE.
En caso de que se detecte algún foco de DNC en Galicia, a Xunta demanda indemnizacións contundentes para os afectados, co fin de mitigar o impacto económico que esta enfermidade pode ter sobre o sector gandeiro galego.