Cervo (Lugo), 9 de novembro de 2025
A xerente da Fundación Artesanía de Galicia, Elena Fabeiro, visitou hoxe Cervo para participar no curso Perfeccionamento de técnicas de forxa, unha iniciativa formativa destinada á divulgación e transmisión do traballo artesanal da forxa. Este curso forma parte do programa pioneiro Aprender da tradición. Oficios e técnicas, impulsado pola Xunta desde 2023, co obxectivo de promover a remuda xeracional no sector artesanal galego, actuando como vertebrador do territorio e fixador de poboación, especialmente no medio rural.
O artesán Telmo Cao é o encargado de impartir esta acción formativa no seu obradoiro, que comezou o pasado 24 de outubro e finalizará o 23 de novembro. Durante a súa visita, Elena Fabeiro puido observar de primeira man o traballo realizado polos asistentes, quen están a aprender diferentes tipos de unións e técnicas de montaxe de pezas tradicionais, como fragmentos de rexas forxadas. Este curso complementa os coñecementos adquiridos no curso de iniciación celebrado en xullo en Cervo, ao que asistiron as mesmas persoas seleccionadas para esta segunda edición.
Un programa único en España
Iniciado a finais de 2023, Aprender da Tradición. Oficios e técnicas é un programa formativo sen precedentes en España, que busca garantir a remuda xeracional no sector artesanal galego. Este programa non só actúa como vertebrador do territorio, senón que tamén se presenta como unha solución para a fixación de poboación no medio rural.
Entre os obxectivos principais do programa atópase a capacitación de artesáns e expertos en oficios artesanais para que poidan transmitir os seus coñecementos. Ademais, busca facilitar a formación de novas xeracións interesadas en aprender estas técnicas, fomentar a comercialización de produtos elaborados por artesáns locais e sensibilizar á comunidade sobre a importancia da conservación dos oficios tradicionais. A iniciativa tamén ten como meta revalorizar e visibilizar os procesos artesanais vinculados aos vellos saberes, ofrecendo novos valores e afianzando un sector artesanal competitivo que aglutine todo o talento existente.
Dirixido a profesionais e novos talentos
O programa Aprender da tradición. Oficios e técnicas está dirixido, por unha banda, a artesáns profesionais inscritos no Rexistro Xeral de Artesanía de Galicia e, pola outra, á captación de novos perfís interesados no mundo da artesanía. Esta segunda liña é fundamental para asegurar o futuro do sector, centrada na remuda xeracional. A iniciativa potencia a formación dunha nova xeración de artesáns cun sólido coñecemento práctico dos seus oficios, proporcionando habilidades que antes se adquirían a través da aprendizaxe directa nos obradoiros, complementando así a formación teórica que se pode recibir nas escolas.
Ademais, existe unha segunda liña que se enfoca na capacitación e profesionalización de artesáns xa en activo, transmitindo técnicas tradicionais e segredos do oficio para mellorar a calidade dos seus produtos finais. Este enfoque permite que os profesionais abran novas liñas de mercado e revaloricen o proceso artesanal, así como o saber facer, como elementos fundamentais para a creación de produtos de alta calidade.